သီးနှံများ၏ ရိတ်သိမ်းချိန်လွန် ဆုံးရှူံးမှုများအား ထိန်းသိမ်းခြင်း

သီးနှံများတွင် မရိတ်သိမ်းမီ ဆုံးရှူံးမှုများနှင့် ရိတ်သိမ်းပြီးချိန်ဆုံးရှူံးမှုများဟူ၍ နှစ်ပိုင်းရှိပါသည်။ ဆုံးရှူံးရာတွင် သီးနှံများ၏ အရည်အသွေး ဆုံးရှူံးခြင်း၊ ထုထယ်ပမာဏ ဆုံးရှူံးခြင်းများ ရှိပါသည်။ မရိတ်သိမ်းမီ ဆုံးရှူံးခြင်းသည် သဘာဝရာသီဥတုဒဏ်များဖြစ်သည့် အပူလွန်ကဲခြင်း၊ အအေးလွန်ကဲခြင်း၊ မုန်တိုင်းတိုင်ခြင်း၊ ရေကြီးခြင်း၊ ရေနစ်မြုပ်ခံရခြင်း၊ မီးလောင်ခြင်း၊ ပိုးမွှားရောဂါ ကျရောက်ဖျက်စီးခံရခြင်း တို့ဖြစ်ပါသည်။ အလွန်ဆိုးရွားသော ရာသီဥတုဖောက်ပြန်မှုဒဏ်များခံရပါက ၁၀၀ ရာခိုင်နှုန်းထိခံကြရပါသည်။ ဟင်းသီးဟင်းရွက်များ မရိတ်သိမ်းမီ ဆုံးရှူံးမှုဖြစ်ရခြင်းများမှာ သီးနှံကာကွယ်ရေးနည်းစနစ်အားနည်းခြင်း၊ ရိတ်သိမ်းစဉ် ထိခိုက်ဒဏ်ရာရရှိခြင်း၊ ဇီဝကမ္မဆိုင်ရာဒဏ်ရာရခြင်း၊ နည်းပညာအားနည်းခြင်းတို့ကြောင့်ဖြစ်သည်။
ရိတ်သိမ်းပြီးချိန်ဆုံးရှူံးမှု ဖြစ်ရခြင်းများမှာ ရိတ်သိမ်းသည့်နည်းစနစ်မမှန်ကန်ခြင်း၊ ရိတ်သိမ်းချိန်မမှန်ကန်ခြင်း၊ သယ်ယူကိုင်တွယ် ခြွေလှေ့စနစ်မမှန်ကန်ခြင်း၊ အခြောက်ခံသည့် စနစ်မမှန်ကန်ခြင်း သိုလှောင်ထိန်းသိမ်းသည့် စနစ်တို့ မမှန်ကန်ခြင်းကြောင့်ဖြစ်ပါသည်။ သီနှံများ ရိတ်သိမ်းနည်းစနစ်မမှန်ကန်ခြင်းကြောင့်ဖြစ်ရခြင်းမှာ အလွန်သတိပြုရမည့် အချက်ဖြစ်ပါသည်။ လက်ဖြင့် ရိတ်သိမ်းခူးဆွတ်သည်ဖြစ်စေ၊ စက်ဖြင့် ရိတ်သိမ်းခူးဆွတ်သည်ဖြစ်စေ နည်းစနစ်မမှန်ကန်လျင် သီးနှံ၏အရည်အသွေးရော၊ ထုထယ်ပမာဏပါ ဆုံးရှူံးရပါသည်။ ရိတ်သိမ်းခြွေလှေ့ သီးနှံများကို စနစ်တကျသိမ်းဆည်းခြင်းမရှိဘဲ စိုက်ခင်းတွင် ညသိပ်ပံထားခြင်း၊ အရိပ်အောက်တွင်မထားရှိဘဲ ဟင်းလင်းပြင်တွင်နေပူထဲ၌ထားခြင်း စနစ်တကျစီစဉ်ထားခြင်းမရှိဘဲ စုပုံထား၍ အပူဓါတ်ဖြစ်ပေါ်ပြီး သီးနှံအားအပူလောင်စေခြင်း၊ အရည်အသွေးပျက်စေခြင်း၊ ပုပ်ယိစေခြင်းများဖြစ်စေပါသည်။ ရိတ်သိမ်းသင့်သည့် အချိန်ထက်စောပြီး ရိတ်သိမ်းမိပါက သီးနှံ၏ဇီဝကာမ္မသဘောအရ ပြည့်ဝသောရင့်မှည့်မှုမရရှိသေးသဖြင့် အရည်အသွေးမမီသော သီးနှံများသာရရှိမည်ဖြစ်သည်။ အထူးသဖြင့် ဟင်းသီး ဟင်းရွက် ၊ သစ်သီးဝလံများ တွင် သယ်ယူပို့ဆောင်ခြင်း၊ ကိုင်တွယ်ခြင်း၊ ခြွေလှေ့ခြင်း၊ ထုပ်ပိုးခြင်းများတွင်လည်း သီးနှံများ ထိုက်ခိုက်ဒဏ်ရာမရှိစေရန် သတိပြုရမည်ဖြစ်ပါသည်။ သီးနှံများ အရည်အသွေးမကျစေဘဲ ရေရှည်ထိန်းသိမ်းထားနိုင်ရန် စနစ်တကျအခြောက်ခံပြီး စနစ်တကျ သိုလှောင်ခြင်းများကို မလွဲမသွေ ဆောင်ရွက်ရန်လိုအပ်ပါသည်။ ပိုးသတ်ဆေး၊ မှိုသတ်ဆေး၊ ပေါင်းသတ်ဆေးနှင့် အခြားစိုက်ပျိုးရေးသုံး ဆေးပစ္စည်းများအား လွဲမှားစွာသုံးစွဲနေမှုများကို အသိပညာပေး ဆွေးနွေးခြင်း ကျယ်ကျယ်ပြန့်ပြန့် ဆောင်ရွက်ရန်လိုအပ်ပါသည်။
အောင်ဆန်း(စိုက်ပျိုးရေး)